Is Christkinnl

Veröffentlicht am: 27.11.2018, 22:04 Uhr - von: Sebastian

Kennt ihr dos ah? Mor will is Weihnachtszeich har reime un stellt fest: Do fahlt ewos, dort gieht a birnl net un hier is wos ohgebrochn. Ja su is dos alle Gahr. Bei mir warn‘s de Christkinner, wu de Belechting schieh lang nimmer wult. Letztes Gahr hoh iechs dann endlich mohl gepackt. Ich hatt is alte Zeich runner gebaut un in neie LED – Lichterbugn drauf gemacht. Nu kahs nimmer su schnell kaputt gieh.

A wing später, als ich unnere Nachbarin getroffn hoh kam is Thema ah ofs Weihnachtszeich un dos ich in dam Gahr geleich alle unnere Christkinner repariert hoh. Do maanet die gute Fraa: „Weste wos, mei Christkinnl gieht fei ah net. Iech hoh ah schie alle Birnle getauscht un is will ahfach net lechtn. Kenntste net emohl dornoch guckn?“ Iech dacht mir: Is kah ja net viel sei, do wart a Kontakt spinne, dos lässt sich bestimmt schnell finden. Iech hoh also ihr Christkinnl ah miet of Arbit genumme un wult noochn Fahler guckn.

Jeds Birle hoh ich durchgemassn und jeden Verbinding geprüft… … nischt! Alles daht stimme, aber is Christkinnl wult net lechtn. Also noch emohl massn. Wieder nischt. Ganz zum Schluss hob ich übern ganzn Bugn gemassn. Alles daht stimme. Alle Birnle hattn Kontakt. Alles??? Moment dar bleede Schalter, do hoh iech net drah gemassn. Inne nah! Dos gibs doch net! Ball zwee Stundn massn, Birle rei un raus drehe for de Katz. Is Christkinnl daht ner net lecht weil dare bleede alte Schalter kaputt gegange war. Iecht hat de Faxn dicke, hoh schnell in Schalter getauscht, dos Ding eigepackt un bieh dormiet eham gefahrn. Ja iecht hatt ah noch ewing Archer über de viele uhneetsche Zeit die dos Christkinnl gefrassn hatt. Dr‘ham bieh ich geleich zor Nachbarsfraah hie. Nu aber fix aufgestellt dos Ding, haupsach dos iechs wieder luus hob.

Is rutschet dar Stecker ball wie von allahne in de Steckduus, dor neie Schalter daht Klickn un dann daht is Christkinnl wieder lechtn. Iech war zefriedn un kriechet of ahmohl mieht dos do noch ewos annersch lechtn und strahln daht. Mir wert noch lange die Fraad in Erinnering bleim, die do in de Aang meiner Nachbarin ze sah war. Se daht mir erzähln dos se ihr Christkinnl zesamme mit ihrm Mah gemacht hoht un extra ah de Belechting hoht machen lossn. Un dos se su fruh is, dos ihr Christkinnl wieder lechtn tut un se ah a bissl an ihrn versturmne Mah erinnert.

Mir war ganz klar dos ich uhne Gald ze namme gar net ze ihrer Tür naus kumme däht. Ihr wisst emmende ah wie dos is. Su wars ah, se hot mir geleich in neie Schalter bezohlt un wullt mir noch mehr Gald for de Reperatur gabn. Iech wullts aber net namme. Ihr Strahln in de Aahng un ihre Fraad war mir Beluhning genuch un mei Archer war vorgassn.

Mir Bläser wulln desshalb ah im Advent un später in dor Weihnachtszeit naus gieh un mit unnerer Musik in Leitn inne Fraad machn un dich mahne net nehr of dich salber ze guckn. Genau wie’s zun Bläsergottesdienst zr Jahreslosing hieß: Vorschreib dich doch inner Aufgob, oder ner Sach die dir liecht, die su wichtig is un die du su gut machst dos mor dich drieber vergisst. Gott zr Ehr un in Mensch zr Fraad.

Dos ihr wisst, wu mir unnerwags sei un wann sich´s luhnt de Fanster emoh ahzekippn, stieht hier, wann mir wu ze hehrn sei:

Sundich 02.12. Do blosn mor im dreie of‘n Weihnachtsmarkt un im fünfe rim sei mor noch ne Runde im Mitteldorf unnerwachs.

Sunohmd 08.12. Do Sei mor noch sechse vom Kirchturm ze hern.

Sundich 09.12. Do tunne mir im Gottesdienst un im fünfe rim im Unnerdorf blosn.

Sundich 16.12. Zum Gottesdienst in Hammer un ab dor fünftn Stund in Kratschum tunne mir Advents- un Weihnachtslieder spieln.

Sunohmd 22.12. Do blosn mir wieder noch sechse vom Kirchturm.

Sundich 23.12. Do tunne mir im fünfe rim im Oberdorf blosn.

Heiligohmd 24.12. sei mir viermittogs im Unnerdorf ze hern un ohmds, su im sieme rim, blos mor zor Heilign Nacht vom Bergblick ins Dorf nei.

Dos sei alles die Zeitn, wu mir unnerwachs sei. Un wenn emende ze annern Zeitn oder wu annersch Advents- un Weihnachtslieder erklinge, dann seis de Bläser von de Methos, die eich von draußn aus dor Kält, nei in de warme Stub de Weihnachtsbotschaft bringe.

Inne ruhige un besinnliche Adventszeit wünscht eich dor Posaunechor.