Dor Schwibbugn un de Peremet

Veröffentlicht am: 22.12.2022, 14:21 Uhr - von: Sebastian

Gieht mor zor Weihnachtszeit a Ringel durch Neidorf lafn, do lechts un scheints aus jedem Haus. Vielerlah Schwibbögn kah mor do betrachtn. Gruße un klaane, runde un eher flache, welche aus Holz un annere aus Blach, geschniedene un geschnitzte kah mor do finden. Un de Motive könntn unnerschiedlicher net sei. Do gibs alte Arzgebirgische Bilder, Krippendarstellinge, aber ah Ortsahsichtn un vieles mehr ze sah.

In manning Fanster un in fast jeder Stub stieht ah ne Peremet. Un do isses net annersch: Is gibt gedrachselte, geschnitzte un gesachte. Manche Peremet gieht elektrisch, annere warn noch mit Karzn ahgetriebn. Is gibt se in ganz klah un ah in ganz gruß, for drinne un ah for draußn. Of su ner Peremet do drehe sich Engel, Bargleit, Hirtn, Schof, de Christgeburt, de Weisn un viele annere Fichurn.

Is Motiv von nem salber gemachtn Schwibbugn oder inner salber gemachtn Peremet zeicht ganz oft wos dam Erbauer oder Besitzer wichtig is oder wos damjenigen gefällt. Uhne Fichurn sieht inne Peremet ah noch nischt aus un uhne inner Darstelling in dor Mitte stieht ah dor Schwibbugn ganz schie naggich doh. Aber is Wichtigste sei dann doch de Lichter of die Dinger. Is dos inne Pracht, su viele unnerschiedliche Bögn un Peremetn, is dos schieh.

Su verschieden wie all die Lichterbögn un wie jede Peremet, su verschiedn sei ah mir Neidarfer. Is gibt gruße un klaane. Is gibt dürre und welche mit bissl ze viel of de Rippn. Is gibt ruhige un ah lautere Zeitgenossn unner uns. Iech denk, mir seih ah alle wie su a Schwibbugn oder ne Peremet. Mir sei von unnerm Herrgott ganz unnerschiedlich gemacht. Mir könne jeder ne annere Sach gut. In Jedm is ewos annersch wichtig. Neja, un su jeder for sich sei mor ah alle ganz scheen ah ze guckn. Ja aber ganz uhne Licht… …do sei mer nischt. Is muss halt a jemand beim Schwibbugn in Stecker nei steckn oder bei dor Peremet de Lichter ahzündn. Un wie is dos bei uns Menschn?

Iech hoh a bissl Angst vorm Strom un mecht net ín de Steckdus greifn. S’däht emende ah ner kurz hall wern. Iech denk mir, unner Herrgot kah dos besser. Dar mecht jedes Weihnachtn wieder ganz nei ze uns kumme, uns immer wieder bei dor Hand namme un unner Harz mit seiner Lieb und Fraad fülln. Gerode su wie dor Arzgebirger de Karzn of dor Peremet noch steckt. Is liecht aber an dir salber, dos ah zuzelossn. Du kast dich ah bockig stelln, wie su a elektrischer Schwibbugn, dar in Kurzn hoht. Dann bleibts dunkel. Noch wos annersch: Su a elektrischer Schwibbugn, wu Strom ahgeschlossn is, aber ah nehr ah Lampl kenn Kontakt hoht, dar macht net gleich is ganze Haus finster, wie dar Kurzschlussdingerich, aber for sich blebbt der ah dunkl. Wenn du also die Fraad un Lieb von unnerm Herrgott ahgenumme hast, dann liechts ah an dir, dos noch aussn ze trogn. Ob nu in unnere Gemeindekreise oder noch Aussn of Arbit oder in de Vereine spielt kah Roll. Halt dorthie, wu’s dich hieh trebbt. Is währ doch schod, wenn du a Schwibbugn oder ne Peremet blebbst, die net lechtn tut.

Un wenns eich grod net su dornoch is, naus ze gieh, weils emmende nass un uhgemütlich is, do hob ich noch wos for eich:

www.youtube.com/watch?v=h9O0N9fO5bw

Hobt fei alle inne gesegnete, scheene un fruhe Weihnachtszeit.